Ein Bahnl macht PUMS.
i Hosch glesen?
ii Naa. Wos?
i Die Zeller fa Meran hot an PUMS gmocht.
ii Isch sie ausgrutscht?
i Naa, BUH hom sie gmocht boll sie in PUMS vorgstellt hot.
ii I verschtea lei Buss und Buhnhouf, wos?
i Sell isch gleich, hot sie hot gsogg, des «beeindruckt» sie nit.
ii Sell gleicht ihr!
i Naa, des find i gor nit guat, wenn des a Burgermoaschterin sogg!
ii I hon gmuant, der Merano-Birgi hoast Medico?
i Schun, ober ba die daitschn dorf sie ummer doktern. SVP, woasch eh.
ii Jo, und wos ischn iatz des PUMS trallala iberhaup?
i A gonz a longer Plan, wia sie kanntn am beschtn in Verkear oowirgn.
ii Öha, miasn mir olle af Bus und Zug umsteign?
i Sie tatn ins derfir saggrisch gearn an extra Bahnl baun!
ii Wossinitsoggsch?
i Fa Schenna durchn Kiachl durch ze de schian Lindenbam unterm Berg
ii Wolla Witz?
i Des nimmp in gonzn Verkear aweck, hobm sie gsogg.
ii Geagea, de ploudern uanfoch ze viel…
i Naa, des muasch imene schun glaabn, des hobm jo die Experten ausgrechnet!
ii «Experten»? Wenn i sell schun lei hear! Epper sou wia pa Corona, ha?
i Ober die Kattarina hot gsogg, nor kannt ma schian af Schenna auigondeln zen «abendessen» und Woolweg schpazziern gian.
ii Jo wou leppm de iberhaup? Des schun find i «abgehoben», wia sie draussn sogn. Uans sog i dir glei: I kimm holt mit an settan bahnl nit zemm hin wo i iberoll hin muas.
i Derfir wars ober sou guat wia gratis!
ii Lei weil der Almfreider mit die Mario-Millionen wachtelt? Hosch du an Ounung! Bold fliag ins do olls um die Oarn und die Leit miasn erschtl amoll schaugn, wia sie sich des «abendessen» derhoam leischtn kennen, drei Eartepfl und a Kaasrint!
i Gea, sei decht nit olm a sou peas!
ii Isch woll wohr. De hom sekko an PUMS.
